"Ang nobelang Noli Me Tangere na isinulat ng ating pambansang bayani na si Dr. Jose Rizal ay masasabing walang kamatayan. Patuloy itong tinatangkilik ng sambayanang Pilipino sapagkat nagpapaalala ito ng ating nakaraan noong panahon ng Kastila. Isinama ito sa kurikulum sa pag-aaral ng asignaturang Filipino sa mataas na paaralan dahil nakasaad sa Batas Rizal 1425 na kailangan isama sa kurikulum ng pampribado at pampublikong paaralan ang pag-aaral sa buhay, gawa, at mga isinulat ni Dr. J. Rizal sa ibat ibang anyo ng panitikan partikular ang nobelang Noli Me Tangere at El Filibusterismo. Nakasaad ang implementasyon ng batas R.A.1425 sa sistemang pang-edukasyon simula 1956 tungo sa mabisang pagpapatupad nito. Bunga ng batas na ito, maraming nagsagawa at bumuo ng sariling pag-aaral at pagpapahalaga sa mga nabanggit na nobela. Isa na rito ang may-akda na si Emerlinda G. Cruz na nagdisenyo ng sarili niyang mga gawain sa pag-unawa, pagpapahalaga at pagsusuri sa nasabing nobela. Nilinang sa kanyang aklat ang pagpapalawak ng talasalitaan, apat na uri ng antas sa pagbasa, kritikal na pagbasa, halagahang pangkatauhan, at pagpapayaman sa aralin na nilakipan ng iba''t ibang gawain na makatutulong sa pagpapaunlad ng kaalaman ng mga estudyante."--